Սույն թվականի նոյեմբերի 13-ին, Կոնգրես հյուրանոցի շքասրահում “Հայաստանի Հելսինկյան կոմիտե” իրավապաշտպան հասարակական կազմակերպությունը կազմակերպեց «Խաղաղ հավաքների ազատության մոնիթորինգը Հայաստանում» զեկույցի ներկայացումը: Զեկույցը արտացոլում է Հայաստանի Հելսինկյան կոմիտեի կողմից 2008թ, սեխպտեմբերի 26-ից մինչև 2009թ. հունիսի 30-ն ընկած ժամանակահատվածում Հայաստանում իրականացված հավաքների ազատության մոնիթորինգի արդյունքները: Մոնիթորինգը կատարվել է “Հանրահավաքների ազատության մոնիթորինգի ոլորտում իրավապաշտպանների կարողությունների զարգացում” ծրագրի շրջանակում, որն իրականացվել է ԵԱՀԿ ժողովրդավարական հաաստատությունների և մարդու իրավունքների գրասենյակի աջակցությամբ:
Զեկույցի ներկայացմանը մասնակցում էին կոմիտեի կողմից հրավիրված շուրջ 100 ներկայացուցիչներ` պետական մարմիններից, դեսպանատներից, միջազգային և տեղական կազմակերպություններից:
Բացման խոսքով հանդես եկան “Հայաստանի Հելսինկյան կոմիտե” ԻՀԿ նախագահ Ավետիք Իշխանյանը, ԵԱՀԿ Երևանյան գրասենյակի դեսպան Սերգեյ Կապինոսը, ԵԽ գլխավոր քարտուղարի հատուկ ներկայացուցիչ Սիլվիա Զեհեն, ԵԱՀԿ/ԺՀՄԻԳ մարդու իրավունքների բաժնի փոխտնօրեն Ասյա Իվանթչևան: Նրանք իրենց ողջույնի խոսքերում կարևորեցին զեկույցը, շնորհակալություն հայտնեցին մոնիթորինգն իրականացնողներին և զեկույցը կազմողներին և անդրադարձան առաջարկություններին:
Զեկույցին անդրադարձան նաև ծրագրին աջակցող ԵԱՀԿ/ԺՀՄԻԳ փորձագետներ Նիլ Ջարմանը և Վարդան Պողոսյանը, ԵԽ փորձագետ Ջեյմս Սուինին, ԵԽ ներկայացուցիչ Օսկար Ալարկոն: Նրանք նշեցին, որ կատարվել է հսկայական աշխատանք և Հայաստանում նման ծավալի աշխատանք դեռևս չէր իրականացվել: Նրանք նաև կարծիք հայտնեցին, որ թեև մոնիթորինգը ընդգրկել է կարճ ժամանակահատված, սակայն այն արտացոլել է Հայաստանի ընդհանուր պրակտիկան:
Ավետիք Իշխանյանը ներկայացրեց զեկույցում արտացոլված ուսումնասիրության արդյունքները, այնուհետև հետևեցին հարց ու պատասխաններ, որից հետո սկսվեց քննարկումը: Քննարկման ժամանակ ակտիվ մասնակցություն ցուցաբերեցին տեղական հասարակական կազմակերպությունների ներկայացուցիչները, հնչեցին տարբեր կարծիքներ:
Վերջում Ավետիք Իշխանյանը շնորհակալություն հայտնեց փորձագետներին և դիտորդներին: Նա նշեց, որ հետագայում նույնպես կփորձեն հետևել ՀՀ-ում խաղաղ հավաքների անցկացմանը, իսկ իրավիճակը փոխելու համար առաջարկեց համագործակցել ոստիկանության հետ: Նա նշեց նաև, որ զեկույցը ուղարկվել է բոլոր շահագրգիռ պետական մարմիններին և տեղական ու միջազգային կազմակերպություններին:
| 
Կայքը գործում է Բաց հասարակության ինստիտուտի օժանդակությամբ /Բուդապեշտ/ 